Sunday, April 13, 2008

Duha ka Baking Contests himoon sa Abril 7 sa Jimenez

Mario L. Cuezon
April 1, 2008

Magbaha ang mga pan, cakes ug native delicacies sa munisipyo sa Jimenez, Misamis Occidental Karong Lunes, Abril 7, 2008.
Duha ka baking contests and himoon sa maong lungsod sa maong higayon.
Sa buntag himoon ang Municipal-Wide Baking Contest nga bukas lamang sa mga manghimoay og pagkaon nga nagpuyo o gikan sa Jimenez.
Sa hapon, himoon ang 1st Pilmico Open Invitational Baking Contest nga mahimong apilan sa bisan kinsa nga interesado. Sa ato pa, bukas kini sa taga-Jimenez ug sa taga-gawas sa Jimenez, kadtong gikan sa Misamis Occidental ug bisan taga-laing probinsya, nasud ug bisan pag taga-laing planeta.
Sa Municipal-Wide Baking Contest, dunay siyam ka kategorya nga mahimong apilan sa taga-Jimenez:
Best Traditional Torta
Best Modern Torta
Best Chiffon Cake
Best Chocolate Cake
Best Patatas
Best Cookies
Best Suman (dahon sa saging ang putos)
Best Bibingka
Best Puto-Bugas
Ang Best Traditional Torta kadtong karaang torta nga gihimo sa atong katigulangan. Kini gigamitan sa third class flour, papel hapon ug mahimong gagmay o dagko, depende sa gusto sa magluto. Ang Best Modern Torta kadtong hinimo nga dunay mga bag-ong sangkap o lahi na og hitsura kung ikumpara sa tortang karaan. Ang Best Chiffon Cake mahimong ordinary, mocca, chocolate ug unsa pa diha ang gidugang nga ingredients basta and porma ug kalami niini chiffon. Ang Best Chocolate Cake mahimong butangan og icing nga chocolate o palaman nga caramel o leche flan basta basically chocolate cake gyud. Ang Best Patatas mahimong lain-lain og porma, gidak-on ug mahimong dungagan og mga ingredients nga pangpalamian basta mailhan pa nga patatas gyud siya. Ang Best Cookies mahimo usab nga lain-laig kolor, lami, gidak-on, ingredients basta makit-an nga cookies pa gyud ang kalami.
Sa Best Suman, kinahanglang pilit nga puti ra ang gamiton ug giputos sa dahon sa saging. Sa Best Bibingka, bisan unsa nga klase nga materyal ang himoong bibingka. Mahimong bugas nga gigaling, kamoteng kahoy o unsa pa diha pero dili harina. Sa Best Puto Bugas, mahimong iapil ang gigaling nga bugas humay o mais pero dili mahimo ang harina nga gikan sa trigo o wheat.
Aduna usay photography contest nga gipahigayon uban sa New Lam Chiong nga bukas sa bisan kinsa nga interesado, bisan og dili pa taga-Jimenez. Duha ang kategorya:
Best Photograph of Processed Foods made in Jimenez
Best Tourist Spot of Jimenez
Ang interesado nga moapil sa photography contest kinahanglang magpadevelop sa ilang letrato sa New Lam Chiong sa Ozamiz ug didto magfill-up og registration form. Ang letrato kinahanglang 8 by 10 ang gidak-on.
Ipahibalo usab sa buntag sa Abril 7 ang nakadaog sa Cleanest Bakery Contest nga gihuwesan sa mga empleyado sa Municipal Health Office sa ilawom sa superbisyon ni Dr. Carolyn Quimbo-Galleros.
Sa ala-una sa hapon ang sugod sa 1st Pilmico Open Invitational Baking Contest nga apilan sa mga bakeries gikan sa sulod ug gawas sa Jimenez.Ang maong kontes bukas sa bisan kinsang bakery o manghimoay og pan sa bisan asang lugar sa probinsya, kasikbit nga probinsya sa Lanao o Zamboanga o sa Mindanao o Pilipinas.
Para sa moapil, kinahanglang dal-on nila ang ilang linuto nga pan sa ala-una sa hapon sa Abril 7 diha sa ikaduhang ang-ang sa munisipyo sa Jimenez. Kinahanglang magfill-up sa registration form ang moapil ug mobayad og P10 kada food entry. Mahimong moapil og pila ka entries sa tanang kategorya.
Apil sa maong kontes ang upat ka kategorya:
Best Pan de Sal
Best Pan de Leche
Best Ensaymada
Best New Bread o Bag-ong Pan
Kini mao ang pinakauna gayud nga invitational baking contest diri sa Misamis Occidental.
Ang makadaog makadawat og plake ug harina gikan sa Pilmico Foods Corporation ug ang titulo nga pinakalami nga mga pan sa atong probinsya karong tuiga.
Ang mga premyo gipahigayon ni Sheila Cuyos, marketing officer sa Pilmico Cebu ug Jerson C. Laban, sales manager sa Zamboanga-Misamis area.
Pormal na nga miaplay sa pag-apil ang La Europa Bakeshop nga nakabase sa Geege MegaMall sa Ozamiz City.
Verbal nga nagpahayag og interes ang JYT House of Bread, Carmela Dulce, Bag-ong Ozamiz Bakeshop ug Mark’s Bakeshop sa Ozamiz ; Lee Bakery sa Tudela ; SBU Bakeshop, Jesse and James Bakeshop sa Oroquieta ug Ukay Bakeshop ug Sunny Bee Bakeshop sa Jimenez.
Nahatagan na og imbitasyon ang mga mayor sa Bonifacio, Tangub, Ozamiz, Oroquieta, Clarin, Tudela, Sinacaban, Panaon, ug Aloran sa pagpahibalo sa ilang ginsakpan. Gipadalhan na usab ang mga dagkong bakeries sa maong mga lugar.
Naimbitar sa Bonifacio ang Three Sisters Bakeshop, Geisha Bakeshop, Noval’s Bakeshop ug Momongan Bakeshop. Sa Ozamiz, nahatagan og sulat-imbitasyon ang Madelicious Bakeshop, City Bakehouse, Mark’s Bakeshop, Bag-ong Ozamiz Bakeshop, Carmela Dulce, Western Mindanao School of Technology, Park n’Go, Julie’s Bakeshop, Sam’s Bakeshop, Bernal’s Bakery, Ria Thrifty Mart Bakery, Red Cherry Bakery, La Europa Bakeshop, Rowena’s Bakeshop, Golden Bakeshop, Offelieth’s Bakeshop, JSW United Bakery, JYT House of Bread ug Naomi’s Bakery.
Karaan nang mga bakeries ang Naomi’s Bakery, Sam’s Bakery, JSW United Bakery ug Bernal Bakery. Nailhan ang Naomi’s Bakery ug Offelieth’s Bakery sa ilang gihimong patatas samtang ang Sam’s Bakery nailhan sa ilang mga cookies. Ang Carmela Dulce nailhan sa ilang chocolate cakes, siopao ug meat bread samtang ang JYT House of Bread ilado sa ilang pan de leche ug nagkalain-laing native delicacies. Ang La Europa nailhan sa ilang baguettes, lean bread ug produktong para sa high end market.
Ang Madelicious Bakeshop, Bag-ong Ozamiz Bakery, Western Mindanao School of Technology, JYT House of Bread ug Offelieth’s Bakeshop nakadaog na sa 1st Ozamiz Baking Contest niadtong 2007 nga gipasiugdahan sa Ozamiz City LGU
Sa Clarin, naimbitar ang Bano Bakery, S and J Little Bakeshop, MJV Bakeshop, Layman’s Bakeshop, ER Rowena’s Bakeshop. Sa Tudela, nahatagan ang Lee Bakery ug JJ and J Bakery. Ang Lee Bakery nailhan sa ilang pineapple pie, buko pie, puto-cheese ug uban pa. Sa Sinacaban, napahibalo na ang Fatima’s Bakery, PJT Bakery, Atina Breadhaus, Keene’s Bakeshop ug Phesas Mini-Bakery. Sa Panaon, naimbitar ang Deothel Bakery ug H & N Bakeshop.
Napahibalo sa Jimenez ang 14 ka mga bakeries ug daghang mga home-based food processors. Sa mga bakeries, nakadaog na niadtong miaging tuig ang Magadan’s Bakery, Three Sister’s Bakery, Ukay’s Bakeshop ug Ellys Bakeshop. Sa mga home-based food processors, mananaog na sa baking contest niadtong 2007 silang Janice Luzano (Joy and Jay’s Cakes, Art Cakes and Party Balloons), Leonila Berhay, Luz Sumena, MATALBA ARC, Teresita Lasta ug Mercy Duhaylungsod.
Sa Aloran, napahibalo ang 3J Bakeshop, Pan de Aloran, Je-zel Store, Darling Store ug Jar’s Bakeshop. Sa Oroquieta, napahibalo ang SBU Bakery, CitiBread, Pure Pilipino Bakery, Julie’s Bakeshop, Park n’ Go, Valmoria Bakery, Carmela Dulce, Wholesome Bakery, AHL Richie, Ahl Rosie Bakery, Rowena’s Bakery ug Saint Martin’s Bakeshop. Ang SBU Bakeshop nailhan sa ilang raisin ug chocolate loaf breads.
Kini mga kontes gipasiugdahan sa Jimenez local government unit sa ilawom ni Mayor Ranulfo B. Limquimbo, Jimenez Bakers and Other Food Processors Association, Department of Trade and Industry, New Lam Chiong ug Pilmico.
Kini ang ikaduhang tuig nga maghimo og baking contest atol sa Araw ng Jimenez.
Para sa registration, palihog tawag kang Marilyn Medez sa mayor’s office (099-272-3808) o kang Tata Maulas-Luza, chair sa baking contest committee sa 0921-954-4498.

No comments: